लोकप्रिय लोक तथा दोहोरी गायिका टिका पुनको “टिका पुन सांगीतिक साँझ” आयोजना हुने भएको छ । यस कार्यक्रम २०७९ माघ २१ गते शनीबारका दिन काठमाडौं स्थित नेपाल प्रज्ञा प्रतिष्ठानको हलमा भब्य रुपमा हुने भएको हो ।

सांगीतिक साँझको कार्यक्रम दर्पण संगीतालयले आयोजना गरेको हो भने सत्यवती कला केन्द्रले सहकार्य गरेको छ ।

सुर्खेतमा जन्मिएकी बहुचर्चित गायिका टिका पुनको कर्म घर दाङ हो । हाल: उनले काठमाडौंलाई कर्मथलो बनाएर आफ्नो सांगीतिक कर्मलाई निरन्तरता दिइरहेकी छिन् । गायिका पुन थुप्रै संघ संस्थाहरुमा पनी आबद्ध हुदै आएकी छिन् । टिका पुन दर्पण संगीतालयको कार्यक्रम सञ्चालिका समेत हुन् । साथै उनी राष्ट्रिय लोक तथा दोहोरी गीत प्रतिष्ठान नेपालको निवर्तमान सह – कोषाध्यक्षको भूमिकामा रहेर समेत काम गरिसकेकी छिन् ।

कार्यक्रमलाई कर्णाली कलाकार समाज, कर्णाली युथ भोलीन्टियर्स, कालीकोटका युवा नेता तथा समाजसेबी ब्यक्तित्व भुपेन्द्र जंग शाहीले सहयोग गर्ने प्रतिबद्धता जनाएका छन् । केही समयपछि पत्रकार सम्मेलन गरी सम्पुर्ण कार्यतालिका बारे जानकारी गराउने कुरा टिका पुनले बताएकी छिन् ।

धेरै विधाका गीत गाउन पोख्त गायिका टिकाले थुप्रै लोकप्रिय गीतहरुमा आफ्नो आवाज दिइसकेकी छिन् । लालुपाते फुल छैन रुख मात्रै, सलल बगेको भेरी नदी, क्षितिज पारी उनको बस्तीमा, म पुजा गर्छु मायाको, ए बि सि डि, समाजको बन्धन, छोरी पाए, यो मार्मिक सन्देश, जुन पनी दाग छ, तिम्रो दर्शन पाईन, पोखरा फेवाताल घुम्नलाई, म त जुनी जुनी लगायत थुप्रै गीतहरुले चर्चा बटुल्न सफल भएका थिए ।

टिका पुनले ६ हजार भन्दा बढी गीतहरुमा स्वर दिईसकेकी छिन् । सानै छँदा गायनमा रुची राख्ने टिका पुनले बिगत १८ बर्ष देखी सांगीतिक क्षेत्रमा कर्म गर्दै आईरहेकी छिन् । “टिका पुन सांगीतिक साँझ” लाई भब्य रुपमा सफल बनाउन आयोजक टिमले कसरत गरिरहेको कुरा बताउदै सबैले आ-आफ्नो तर्फबाट सहयोग गरिदिन कार्यक्रम संयोजक उदिराम खड्काले अनुरोध गरेका छन् ।

“टिका पुन सांगीतिक साँझ” कार्यक्रम का बिषयमा हामी संग प्रतिक्रिया दिदै गायिका पुनले भन्छिन् “यो कार्यक्रम आयोजना हुनु मेरो लागि गर्वको कुरा हो । सर्वप्रथम त मेरा भगवानरुपी दर्शकहरुलाई नमन गर्न चाहन्छु । त्यसपछि मलाई जन्म दिने बुवा, आमा र मेरो अभिभावक सरह उदिराम खड्का दाई प्रती पनि आभारी छु । उदिराम खड्का दाई यस कार्यक्रमको कार्यक्रम संयोजक पनि हुनुहुन्छ । टिका पुन सांगीतिक साँझलाई सफल पार्नका लाग सहयोग आउनेक्रम जारी छ । सहयोग गर्नुहुने सहयोगीदाताहरु प्रती पनि आभारी छु । टिका पुन सांगीतिक साँझलाई भब्य रुपमा सफल बनाउन सबैले आ-आफ्नो तर्फबाट सक्दो सहयोग गरिदिनुहुन बिनम्र अनुरोध गर्दछु ।” भनेर गायिका पुनले सबैलाई अनुरोध गरेकी छिन् । हाम्रो तर्फबाट पनि कार्यक्रम सफलताको शुभकामना व्यक्त गर्दछौं ।