काठमाडौं उपत्यकामा भारी वर्षा भएको छ। बुधबार राति करिब साढे १० बजेदेखि उपत्यकामा भारी वर्षा सुरु भएको हो ।

उपत्यका र आसपासका क्षेत्रमा मेघगर्जन र चट्याङसहित अहिले  भारी वर्षा भइरहेको छ। यसवर्षको मनसुन नेपाल नभित्रिँदै वर्षा सुरु भएको छ। हाल देशमा पश्चिमी वायु तथा स्थानीय वायुको प्रभाव रहेको छ । साथै बंगालको खाडी र अरब सागरबाट आएको जलवाष्पयुक्त हावाको समेत आंशिक प्रभाव रहेकोले वर्षा भइरहेको जल तथा मौसम विज्ञान विभाग, मौसम पूर्वानुमान महाशाखाले जनाएको छ ।

जल तथा मौसम विज्ञान विभागले यस वर्ष यही जेठ १८ गतेदेखि आगामी असोज १४ मनसुन अवधि हुने र गण्डकी प्रदेश, लुम्बिनी प्रदेशको उत्तरी भाग र कर्णाली प्रदेशको पूर्वी भागमा सरदरभन्दा बढी वर्षा हुने बताएको छ ।