News Portal

विप्लव निकट अखिल (क्रान्तिकारी)ले निर्माण गर्यो विकट गाउँमा विद्यालय

फरकपोस्ट संवाददाताभदाै ४ काठमाणडाैं
३२४ पटक
भदाै ४ काठमाणडाैं

विप्लव नेतृत्वको नेपाल कम्युनिस्ट पार्टी निकट  विद्यार्थी संगठन अखिल (क्रान्तिकारी)ले धादिङको बेनिघाट-रोराङ गाउँपालिकाको वडा न. १ र २ को सिमाना स्थित अति विकट तामाङ बस्ती रहेको च्यात्रा गाउँमा आधारभूत विद्यालय निर्माण गरेको छ ।

शुक्रबार संगठनले एक कार्यक्रम आयोजना गरि विद्यालयको औपचारिक उद्घाटन गरेको हो । उक्त कार्यक्रममा  नेकपाका महासचिव नेत्रविक्रम चन्द विप्लवले एक सन्देश मार्फत शुभकामना व्यक्त गरेका थिए ।

धादिङ जिल्लाको अति विकट यस बस्तीमा विद्यालय नहुँदा बालबालिकाहरु शिक्षाबाट वन्चित थिए । बस्तीबाट विद्यालय पनि तीन घण्टाको दुरीमा रहेको र भिरालो बाटो भएकोले बालबालिकाहरु पढ्ने अवसरबाट वन्चित थिए ।

नेपाल कम्युनिस्ट पार्टीका नेता कार्यकर्ता प्रतिबन्धको समयमा अभियानको क्रममा त्यस क्षेत्रमा जाँदा विद्यालय नै नभएकोले नेपाल कम्युनिस्ट पार्टी र अखिल क्रान्तिकारीको पहलमा विद्यालय निर्माण गरिएको हो ।

त्यस गाउँमा करिब २५ घर धुरी रहेका छन् । गाउँमा करिब ५० को संख्यामा बालबालिका रहेको अखिल (क्रान्तिकारी) जनाएको छ । यस भन्दा पहिले बालबालिका विद्यालय जाने अवस्था नरहेको अखिल (क्रान्तिकारी)का अध्यक्ष प्रकाश शाहीले बताए ।

अखिल (क्रान्तिकारी)ले  आफ्नै लगानी, श्रमदान र स्थानीयसँगको सहकार्यमा ४ कोठे विद्यालय​ भवनको निर्माण सम्पन्न गरेको हो । भवन उद्घाटन लगत्तै विद्यालयमा पढाई सुरु भएको छ । विद्यालयलाई आवश्यक फर्निचर ,खेलकुद सामग्री र शैक्षिक सामग्री समेत क्रान्तिकारीले उपलब्ध गराएको छ । अहिले विद्यालय​मा ३० जना विद्यार्थी भर्ना भएको विद्यालय​की शिक्षिका अस्मिता घलानले बताइन् ।

 

 

प्रतिकृया दिनुहोस्