स्वर्गद्वारी नगरपालिका प्यूठानले नगरपालिका भित्रका सम्पूर्ण विद्युत ग्राहकहरूको महशुल निशुल्क गर्ने गरि ४० लाख रुपैयाँ बजेट विनियोजन गरेको छ । नगरभित्र बुटवल पावर कम्पनी र नेपाल विद्युत प्राधिकरण कम्पनीको विद्युत लाइन बिस्तार भएका छन । यो भन्दा पहिले बुटवल पावर कम्पनीको विद्युत महसुल मात्र नगरपालिकाले तिरिदिने व्यवस्था गरेकाे थियो ।
यसै आर्थिक वर्षदेखि लागू हुने गरि स्वर्गद्वारी नगरपालिकाभित्र विद्युत प्राधिकरण र बुटवल पावर कम्पनी दुबै प्रशारण लाइन भएका ग्राहकहरूको विद्युत महसुल स्थानीय सरकारले तिरिदिने व्यवस्था गरेको नगर प्रवक्ता सुरज सुनारले जानकारी दिए ।
नेपाल सरकारले विद्युत प्राधिकरणको विद्युत महसुल ६० रुपैयाँ निशुल्क गर्ने र ३० रुपैयाँ ग्राहकले तिर्ने गरि व्यवस्था मिलाउदा कम्पनीले दुईतर्फबाट महसुल असुल गर्न अव्यवस्थित हुने भन्दै सम्पूर्ण शुल्क ग्राहकबाट नै लिने भएपछि सरकारको निति अनुसार ग्राहकले सुविधा पाएका थिएनन । यसरी दुईतर्फको झण्झटिलो शुल्कलाई व्यवस्थापन गर्नको लागि नीति अनुसार ग्राहकको शुल्क तिरिदिन स्थानीय सरकारले बजेट विनियोजन गरेको छ । विगतमा स्थानीय सरकारको कार्यनीतिमा उज्यालो नगरको योजना भए पनि यिनै प्राविधिक समस्याको हल नभएकै कारण कार्यनीति अनुसार ग्राहकले सुविधा पाउन सकेका थिएनन् ।