नेपाली कथानक चलचित्र ‘प्रेम गीत–३’ले हिन्दी गीतमा मात्रै करिब ५० लाख आईसी खर्च भएकाे बताएकाे छ । भारतमा पनि चलचित्र हिन्दी भाषामा डबिङ गरेर रिलिज हुने भएपछि ठूलो बजेट निर्माण पक्षले हिन्दी गीतमा खर्च गरेको हो ।
चारवटा हिन्दी गीत मुम्बईमा रेकर्ड गर्दा ‘प्रेम गीत–३’ले करिब ५० लाख आईसी खर्च गरेको हो । “एउटा गीत रेकर्ड गर्दा १० देखि १२ लाखसम्म खर्च भएको छ,” निर्माता सन्तोष सेनले भने, “५० लाख आईसीको सेरोफेरोमा गीतमा मात्रै खर्च भएको छ ।”
सिनेमाको ब्रान्डिङ र पब्लिसिटीका लागि गीतमा ठूलो रकम खर्चिनु परेको उनको भनाइ छ । “सिनेमाको ब्रान्डिङका लागि पनि गीत चाहिने भयो । कस्तो खालको सिनेमा हो भनेर दर्शकमा सन्देश दिन पनि गीत चाहिने भयो, त्यसैले हामीले हिन्दीमा गीत तयार पार्यौं र ठूलो रकम पनि खर्च गर्यौं,” सन्तोषले भने ।
सिनेमासँग सम्बन्धित कम्पनी र प्रोडक्सन हाउसँगको सम्बन्धका लागि पनि गीत चाहिने महसूस भएको उनी बताउँछन् । “सिनेमा चलाउन र हलसम्म दर्शक तान्न पनि गीत चाहिने रहेछ,” उनी भन्छन् ।
‘प्रेम गीत–३’को ‘कोइ ना कोइ नाता है’, ‘जहाँ भी जाओ’, ‘तुम प्यार हो’ र ‘मुझ मे बस जाना’ गीत रिलिज भइसकेका छन् ।
सन्तोष सेन र छेतेन गुरुङले निर्देशन गरेको चलचित्र असोज ७ गते रिलिज हुँदै छ । चलचित्रमा प्रदीप खड्का, कृष्टिना गुरुङ, सुनील थापा, शिव श्रेष्ठलगायत कलाकार मुख्य भूमिकामा छन् ।
